Torturaren aurka «konpromiso zehatzak» hartzeko eskaera ez du onartu Eusko Legebiltzarrak.
Inkomunikazioa bertan behera uzteko lege ekimena babestu dute EABk, Aralarrek eta hirukoak.
Tortura eta tratu txarren aurkako adierazpen soiletatik haratago ez du, oraingoz, pausorik emango Eusko Legebiltzarrak. Izan ere, Ezker Abertzalea taldeak eta Aralarrek «konpromiso zehatzak» hartzeko eskatuz aurkeztutako legez besteko proposamenak ez du babes nahikorik lortu Giza Eskubideen Batzordean, hirukoak, PSE-EEk eta PPk aurka bozkatu baitute.
Torturaren aurkako ebazpenaren bidez, besteak beste, atxilotutako pertsonekin torturarik eta tratu txarrik erabiltzen ez dela, eta inkomunikazio egoeran atxilotuen eskubideak errespetatzen direla ziurtatzeko Legebiltzarrean batzorde berezia sortzea nahi zuten EABk eta Aralarrek. Batzorde horrek torturak salatu dituzten atxilotuak bisitatuko lituzke. Horrekin batera, tortura lekukotzen aurrean Legebiltzarrak babesa adieraztea, eta nazioarteko erakundeen esku hartzea bideratzea proposatu dute bi taldeek.
Haatik, EAJk, EAk eta EBk ez dituzte eskakizunok begi onez ikusi. Batetik, uste dutelako ez dela Eusko Legebiltzarreko eskumena torturatuen egoera bertatik bertara ezagutzea; eta, bestetik , pentsatzen dutelako «alferrikakoa» dela nazioarteko erakundeen esku-hartzea eskatzea, aurretik jakin gabe tortura salaketak egiazkoak diren ala ez. Gema Gonzalez de Txabarri EAJko legebiltzarkidearen irudiko, Aralar eta EABren jatorrizko ekimenak ez du «inolako eraginkortasunik».
Hori horrela, hirukoak osoko zuzenketa aurkeztu dio proposamenari. Han, tortura salaketen aurrean «kezka» azaldu, inkomunikazioa bertan behera uzteko eskatu, eta Espainiako Gobernuari Nazio Batuen txostengile berezi Theo Van Bovenek emandako gomendioak betetzeko galdegitea proposatu dute EAJ, EA eta EBk. Alta, hirukoaren botoak baino ez dituenez jaso, ekimen hori ere ez da aurrera atera.
Hirukoaren ebazpenarekin ados egon arren, «urratsak» egiteko kopromisoetan «sakondu» nahi ez izatea leporatu diote Aralarrek eta EABk hirukoari. Aintzane Ezenarroren (Aralar) esanetan, hirukoaren zuzenketa orain arte onartutako ebazpenetan geratzen zen, eta beraz,«aukera on bat» galdu da torturaren aurkako urrats zehatzak egiteko. Itziar Basterrikak (EAB) «hitzetatik ekintzetara» pasatzeko garaia dela adierazi du.
PPko Carlos Urkijok, berriz, tortura salaketen aurrean poliziaren «errugabetasun printzioa» aldarrikatu du. Salatu egin du gisa horretako proposamenekin «ETAren estrategiari» babesa ematen zaiola. PSEko Jesus Lozak azpimarratu du sozialistak beti egongo direla torturaren aurka, baina, kritikatu du tortura salaketen atzean «Zuzenbide Estatuari zilegitasuna kentzeko kanpaina» dagoela.
INKOMUNIKAZIOA.
Torturaren aurkako proposamenak ez bezala, inkomunikazioa desagertzeko Aralarrek proposatutako lege ekimen bati oniritzia eman dio Herrizaingo Batzordeak. Onartutako lege ekimenak bi eskaera egiten ditu: batetik, grabazio sistemak ezartzea atxilotuak egoten diren eremu guztietan, eta, bestetik, inkomunikazioa ahalbidetzen duten Prozedura Kriminaleko legearen 520. eta 527.artikuluak bertan behera uztea. Horiek Legebiltzarrak onartu eta Espainiako Kongresura igortzea da asmoa. Aralar, EAB, EAJ, EA eta EBk babestu dute ekimena, eta kontra egin dute PSEk eta PPk. Ezenarroren iritziz, «urrats eraginkorra» egin du Legebiltzarrak. Orain, Legebiltzarreko osoko bilkurak gehiengo osoz onartu behar du ebazpena.
El tripartito rechaza nuevas medidas para prevenir la tortura.
La Comisión de Derechos Humanos del Parlamento de Gasteiz debatió ayer dos propuestas sobre la tortura. Por la mañana, acordó llevar al Congreso español una iniciativa legislativa para poner cámaras en los centros de detención e imposibilitar la incomunicación. Por la tarde, rechazó crear una comisión propia de seguimiento de los casos de tortura.
