Egia aitortu eta errespetatu. Gurutze Iantzi ta Xabier Kalparsoro gogoan zaituztegu. Torturarik EZ !!.
Irailak 22 Larunbata 20:00etan. Urnietako plazan.
Miren Gurutze Iantzi Igerategi bere jaioterrian —Urnietan— atxilotu zuten 31 urte zituenean. Harekin batera beste pertsona batzuk atxilotu zituzten (senarra tartean) Urnietan bertan eta inguruko herrietan (Hernanin, …). Guardia Zibilak Madrilgo Tres Cantosen duen egoitzara eraman zituen atxilotuak berehala, eta Gurutze hantxe hil zen atxilotu eta 24 ordutara, 1993ko irailaren 24ko goizaldean. Hildakoari egindako autopsiak berebiziko garrantzia izan zuen Colmenar Viejoko instrukzio‑epaitegietan egindako prozedura judizialean, eta, teorian behintzat, atxilotuaz arduratu behar zuen Auzitegi Nazionaleko medikuak ateratako ondorioen arabera, berez hil omen zen Iantzi. Akusazio partikularrak eta hark deitutako adituek besterik zioten, ordea, baina instrukzio‑epaileak auzitegiko medikuak emandako bertsioa onartu eta auzia artxibatu zuen, ahozko bistarik egin gabe. Gainerako atxilotu guztiak —torturatu egin zituztenak ere bai— eta hildakoaren senideak konbentzituta zeuden Gurutze poltsa ezartzean eta poltsak eragindako larriminaren ondorioz hil zela.
Gurutze Iantzi hil zen egunean bertan Xabier Kalparsoro Golmaio gaztea atxilotu zuten Gasteizen. Kalparsorok 26 urte zituen eta ETAko kide liberatua zen. Haren atxiloketa bitxi samarra izan zen, Durangoko udaltzainek atxilotu eta, polizia judiziala izateko eskumenik ez zutenez, Bilboko Polizia Nazionalaren esku utzi baitzuten. Polizia horiek Indautxuko (Bilbo) egoitzara eraman zuten Kalparsoro, eta 1993ko irailaren 24ko goizaldean polizia‑egoitzaren inguruko espaloiaren kontra jo omen zuen. Basurtuko Ospitalera eraman zuten, orduan, baina ezin izan zuen bere onera etorri eta hil egin zen, handik bi egunera. Poliziaren bertsioaren arabera, atxilotua ihes egiten saiatzean hil omen zen. Senideek akusazio partikularra aurkeztu zuten eta konbentzituta zeuden Xabier leihotik behera bota zutela poliziek. Izan ere, hilabete lehenago, abuztu amaieran, Kalparsoro legez kanpo —hau da, inongo agintari judiziala jakinaren gainean egon gabe— atxilotu, torturatu, drogatu eta aske utzi zuten, inongo polizia‑gorputzek aldarrikatu ez duen ekintza parapolizial batean amu bezala erabiltzeko, ziurrenik. Bilboko 1. zenbakiko instrukzio‑epaitegian egindako prozedura judizialak hainbat polizia auziperatu zituen, baina Bizkaiko Probintzia Auzitegiak auziperatuen arteko bakar bat zigortu zuen, atxiloketarekin inolako zerikusirik ez zuen arren, polizia‑egoitza zaintzen egonik atxilotuari leihotik jauzi egitea galarazi ez zion polizia soil bat hain zuzen ere. Heriotza eragin zuen zuhurtziagabetasunagaitik zigortu zuten eta, hainbat helegite aurkeztu ondoren, Auzitegi Gorenak polizia hari ezarritako zigorra aldatu egin zuen hainbat gorabeherari erantzunez (denbora igaroa zela, adibidez), eta falta soil batean utzi zuen zigorra.
ADN.es Medio Oficial Premios Bitacoras 2008: