Inkomunikazioa alboratzea eskatzeko lege proposamena Gasteizen.
Gasteizko Parlamentuak atzo onartu zuen Estatu espainoleko Gorte Orokorrek Auzipetze Kriminalaren Legea aldatzeko lege proposamena. EA, EB, EAJ, EHAK eta Aralar alderdien babesarekin onartutako lege proposamenak bi xede ditu; alde batetik, «terrorismo» auziengatik ikertutako pertsonei ezartzen zaien inkomunikazio erregimena alboratzea. Beste aldetik, polizia-etxeetan bideokamerak ezartzea exijitzen du.
Testua onartu duten taldeen aburuz, tortura desagertzea ziurtatzeko «denbora eta leku ilunak desagerrarazi behar dira, une horietan, atxilotutako pertsonaren bermeak ahultzen direlako», argudiatu zuten.
PSE eta PP alderdiak izan ziren proposamenarekin bat egin ez zuten bakarrak. PSEko parlamentari Rodolfo Aresen iritziz, oraingo legediari eustea «erabat ezinbestekoa» da, haren ustez, «lan asko» baitago egiteke «ETAren amaierara iristeko». Gasteizko Legebiltzarrean, PPko bozeramaile Carlos Urquijok Aresen esanekin bat egin zuen, eta inkomunikazioa aplikatu ezean, atxiloketa baten ostean «ikerketan ezinbestekoak izan daitezkeen pertsonak eta materialak desagertu daitezkeela» argudiatu zuen.
Urquijok adierazi zuen Estatuko Segurtasun Indarren desprestigioan ez zuela parte hartuko, eta grabazioak egiteak polizien eta abokatuen lana «serioski zailduko» lukeela azaldu zuen.
Madrilera.
Lege proposamen hori Gasteizko Parlamentuko Instituzio eta Barne Batzordean onartu zuten, eta ondoren Kongresu espainolera eramango dute han eztabaidatzeko. Bertan kokatzen dute gakoa legebiltzarkide hauek. Torturaren aurkako erakundeek eta adituek, ordea, Lakuari ere dei egin diote aspaldi, inkomunikazioa erabil ez dezan.
Atzo adostutako testua bi artikulutan banatzen da. Lehenak atxilotuen zaintzaren arduradunak, atxilotuaren eskubideak eta funtzionarioen segurtasuna bermatzeko polizia-etxeetan grabazioak egitea eskatzen du. Bigarrenak, aldiz, inkomunikazioa alboratzea proposatzen du.
