Ongi etorri jendetsua egin diote Insaustiri jaioterrian.
Jende ugari hurbildu zen Juan Mari Insaustiri eginiko ongi etorri ekitaldira.
Herenegun eguerdian egin zitzaion ongietorria Juan Mari Insausti euskal preso politiko ohiari. Bertaratutakoen arabera «berezia ez ezik momentu hunkigarri ugari» bizi ahal izan ziren; Goierri eta inguruko jende asko hurbildu zen Loinazko San Martin plazara.
Urtarrilaren 20an Soto del Realeko espetxea utzi eta aske gelditu zen Juan Mari Insausti arriarandarra. Beasainera iritsi bezain pronto harrera egin zioten, baina herenegun burutu zen ezker abertzaleko erakundeen partetik ekitaldia.
Eguerdiko 13:00etan txalaparta doinuekin eman zioten hasiera ongietorriari. Atzealdeko pankartan adierazten zen moduan euskal preso eta iheslari guztiak ere gogoan izan zituzten. Horren adibide izan zen ekitaldian zehar eskualdeko presoen argazkiekin eszenatokira igo izana.
Txalapartariek beren saioa bukatu ondoren, Aitor Sarriegik eta Iñaki Apalategik bertsoak eskaini zizkioten. Kantu doinuez ondoren dantzariek eskaini zioten saioa: Aurreskua eta Ikurrin-dantza egin zituzten Insausti eta bildutakoen begiradapean.
Igor Eguren beasaindarraren hitzak entzun ziren segidan, eta gero ezker abertzaleko ordezkariek hartu zuten lekukoa. Oroigarriak eta opariak eman zizkioten preso ohiari. Ekitaldia bukatzeko, Askatasunaren izenean, eta beti ere euskal preso politikoak gaitzat hartuta, testu bat irakurri zuen Josu Lopezek. Eguneko omenduak ere hartu zuen hitza.
Ongietorria bukatu ondoren manifestazioa egin zen herriko kaleetan zehar, Euskal preso eta iheslariak etxera lemapean. Eguerdi partean, berriz, bazkaria izan zen Arrano kultur elkartean. Bertan bildutakoek azaldu dutenez «giro ezin hobea izan zen bazkarian, bertsotan ere aritu ziren batzuk».
ADN.es Medio Oficial Premios Bitacoras 2008: