Ongietorria egin zieten atzo Garmendiari eta Rekondori.
21 urtez preso egon eta igaro urtarrilaren 5ean askatasuna berreskuratu zuten Jabi Garmendia lezoarra eta Zaine Rekondo lesakarra, biak ala biak preso politiko ohiak, omendu zituzten atzo euren sorterrietan. Ekitaldiaz beste, manifestazio jendetsuak izan ziren. Lezon, gainera, orain 26 urte BVEk hil zuen Karlos Saldiseri omenaldia egin zioten.
Lezon eta Lesakan bina ongietorri egin zituzten atzo, biak orain gutxi askatasuna berreskuratu duten preso politikoei. Lezon, gainera, Batallon Vasco Españolek orain 26 urte hil zuen Karlos Saldise omendu zuten; hain justu, gaur urteurrena betetzen da.
Joan den urtarrilaren 5ean berreskuratu zuen askatasuna Jabi Garmendia lezoarrak, 21 urtez Estatu espainoleko zazpi espetxe ezberdinetan gatibu izan ostean.Atzo 500 lagun baino gehiago izan ziren 13.00etan hasi zen ekitaldian. «Askatasuna lortu arte, lanean jarraitzeko eskatzen dizuet», esan zien lezoarrak bertaratuei, eta espetxe barruan utzi eta «bidean eroritako» kideez gogoratu zen.
Ostean, manifestazioa egin zuten kaleetan barrena, berriro ere Karlos Saldise plazara joan, eta bertan bere izena daraman herritarra omendu zuten.
Lesakan ere, bederatzi hilabetez preso egon den Zaine Rekondori ongietorria egin zioten herritarrek. Jende ugari bertaratu zen eguerdian herriko plazara, bai eta ostean egindako manifestaziora ere.
Bestalde, atzo, 31 lagun elkartu ziren Otxandion euskal presoen eskubideen alde. Atarrabiako 35 bat herritarrek martxa egin zuten Alamako (Galizia) espetxera, eta hango euskal preso politikoak bisitatu eta elkartasuna adierazi zieten.
