Nafarroan bahitu eta leioan zentsuratu!. Bego Luzaide - Leioako Amnistiaren Aldeko Mugimenduaren izenean.
Bai, hala da, harrigarria suerta daitekeen arren, Leioako Udalak Olentzeroari zentsura aplikatzen arazorik ez du. Zergatik zentsuratu? Udaleko arduradunen hitzetan, «politikoa» omen delakoan.
Udaleko Kultura Sailak Eguberrietan Olentzero erakusketa antolatu zuen; herriko elkarteek eginiko olentzeroen erakusketa, alegia. Herriko zenbait elkartek parte hartu zuten ekimen honetan, eta berauetako batek egindako Olentzeroa da kultura teknikariak «politikoa» zelakoan erakusketatik kanpo utzitakoa.
Olentzero honek euskal preso politikoen sakabanaketa salatu eta gatazkaren konponbidearen parte badirela aldarrikatzen zuen. Politikoa dela? Jakina baietz! Baina gure herriko errealitatea ere bada, eta errealitate hau ezkutatu nahi izatea, horixe bai badela politikoa, are gehiago, Olentzero honen xedea presoen eskubideak aldarrikatzea izanik honi zentsura aplikatzea ekintza politikoa ez ezik kutsu faxistakoa ere badela esango nuke.
Ezin da ulertu Euskal Herriko eragileek gatazkaren konponbidean ahalegin handiak egiten diharduten bitartean, nola Leioako Udaleko gobernuak norabide honetan lagundu beharrean oztopoak jarri besterik ez duen egiten, eta gero eskubide ororen defendatzaile direla entzun beharko dugu: hipokrisiarik ez, faxismorik ez. Olentzero ere euskal preso politikoen eskubideen alde!.
