Konponbidearen eta preso politikoen alde. Joseba Permach eta Xabi Larralde (mahaikideak).
Urte gogorra izan da 2005a euskal preso politikoei eta euren senitarteko eta lagunei dagokienean: heriotzak, istripuak... gertatu dira, presoen artean, bai eta presoei maitasuna erakustera hurbildu izan direnen artean ere. Izugarriak izan dira espetxe politikak ekarri dituen ondorioak!.
Frantziar zein espainiar estatuek erabakitako ondorioak dira. Kalkulu politikoaren arabera erabakitakoak. Kalkulu horren atzean zer dago? Euskal Herriaren ukapena eta dagozkion eskubideen urraketa. Horixe. Hor kokatzen dira espetxe politika eta hark dakartzan ondorio latz eta mingarri guztiak.
Bi estatuek, egun, muzin egiten diote herri honek presoen inguruan erakutsitako borondateari eta hartutako erabaki politikoari. Eta horregatik erasotzen dituzte euskal presoak, euren senitarteko eta lagunak.
Horregatik, Batasunaren iritziz, heldu da ordua Euskal Herriko eragile guztiok, herritar orok, euskal preso politikoen inguruan jarrera tinko bat hartzeko. Ezin dugu egonean egon. Esku gurutzaturik geratu.
Ulertezina litzateke esku gurutzaturik geratzea, noiz, eta herri hau libre eta demokratikoki antolatzeko aukera berri bat zabaltzen, gorpuzten ari garenean. Euskal Herria libre eta demokratikoki eraiki nahi dugun guztiok euskal preso politikoen gaia ere ardura nagusiz hartu beharrean gaude.
Ordua da, beraz, Euskal Herriaren, konponbidearen eta presoen eskubideen alde egon dagoen masa sozialarekin aurrera egiteko. Alde horretatik, guztiz txalogarria iruditzen zaigu Ibaetako Foroaren ahalegina. Indarrak biltzeko erakutsi duten gaitasunagatik; eta era berean, indar horiek guztiak martxan jarri dituztelako.
Alderdi politikoek ere egundoko erantzunkizuna dugu. Hainbatek hala ulertu dugu, bederen, eta deialdi bateratua bultzatu dugu, larunbat honetan burutuko den manifestazioari begira.
Hutsuneak hor daude, ordea. Nabarmenak oso. Badago alderdi bat, PNV kasu, Madrilekin negozio propioaren mesedetan akordioak sinatzen ari dena, presoen eskubidean defentsan urrats txikiena emateari uko eginda. Horra Josu Jon Imazen kalkulu politikoa zertan den. Kontuan hartzekoa.
Hala ere, ez da jarrera hori erakusten duen alderdi bakarra. Eta gauzak horrela, Batasunak galdera batzuk egiten ditu, ozen: Horiek al dira eskubide guztien alde daudenak? Horiek al dira herriaren hitza eta erabakia errespetatu behar dela diotenak? Euskal preso politikoak zapaldu, isildu, baztertzen dituztenean... deus ere egiteko prest ez daudenean!
Bakoitzak jakingo du zertan ari den. Eta zer egiteko prest dagoen une honetan, Euskal Herriaren etorkizun libre eta demokratikoa jokoan dagoen unean; hor kokatzen dugu presoen eskubideen defentsa. Euskal pre- soak eskubide guztien jabe nahi ditugu, eta gainerako eragile guztiekin batera herri honetan zabaldu nahi den prozesuaren parte.
Hauxe da gure kalkulu politikoa, ez besterik. Errepresioaren kalkulu itsuari demokrazia eta eskubideen defentsaren kalkuluarekin erantzutea.
Beraz, hau da Batasunaren konpromisoa, eta hau guztia indartzeko, hau guztia mugiarazteko, ahalegin berezia eskatu nahi diogu, hasteko gure buruari, eta euskal herritar orori, euskal preso politikoen eskubide guztien alde borrokatzeko, gaur Bilbon, eta bihar nork bere herrian, lantegian, eskolan edo unibertsitatean.
