Hauteskunde ekitaldi batean parte hartu zutelako, epaiketa.
Hiru getariar epaituko dituzte abenduaren 20an, 10.30ean hasita, Azpeitiko Epaitegian, iragan apirilaren 10ean Batasunak Getarian antolatutako hauteskunde ekitaldi batean parte hartzeagatik. «Desordena publikoa» leporatzen diete.
Indar abertzaleak ekitaldia antolatu zuen egun horretarako hauteskunde autonomikoen kanpainaren barruan, baina, hasi aurretik, Ertzaintzak inguru osoa hartu zuen; porrak eta pilotak jaurtitzeko fusilak zituzten. Iragarritako hamaiketakoa egin ahal izan zuten bertaratutakoek, baina ekitaldia ez. Eta, azkenean, ertzainak jendearen aurka oldartu ziren. Herritar bat begian zauritu zuten.
Gipuzkoako herri horretako Udalak ere publikoki gaitzetsi zuen gertatutakoa, eta Lakuako Gobernuari idatzia igorri zion kexua agertuz.
Hiru getariarrei sostengua emanez, herriko hainbat eragilek idatzia aurkeztu zuten irailaren 30ean, eta prozedura bertan behera uzteko eskatu zuten. Epaiketa egunean, elkarretaratzea egitekoak dira.
