Langraizko egoerari buruzko datu gehiago.
Salhaketako abokatu Jaime Elias eta Marta Aldanondo pozik agertu dira Langraizko Segurtasun zuzendariorde ohi Mariano Merinoren espetxeratuei eginiko ustezko sexu-erasoen eta mehatxuen gaineko prozesuak hartutako bidearekin.
Iragan astelehenean, espetxeko bost funtzionario pasa ziren epailearen aurretik. Horietatik bik sexu erasoen gaineko datu gehiago eman zituztela aditzera eman zuen presoen aldeko elkarteak. Are gehiago, salaketa ezarri duen emakume preso baten jazoera berretsi zuen, antzeko kasu gehiago existitu daitezkeela eta preso batzuen disziplinazko espedientearen tratamenduan aldeko tratua eman dela aditzera eman zuen batek.
Salhaketako kide Carlos Hernandezek gogora ekarri duenez, jada zazpi salaketa jarri dira pertsona horren kontra. Lau emakume sexu-indarkeria eta mehatxuak direla medio, eta gainontzeko hirurak jazarpen ekonomikoagatik. Horiez gain, egunotan, bi emakumek Merinoren ustezko erasoak nozitu eta beste bik aldeko tratua jaso zutela jakin dutela nabarmendu zuen.
Datu horien ondorioz, kasua daraman epaileak aitorpen gehiago jasotzea erabaki du. Hiru presorena eta bi funtzionariorena, hain zuzen ere. Eskatutako froga dokumentalak hel daitezen espero da, eta salaketa kopurua nabarmen igo denez, sexu-erasoenak bestelako gaietaz bereiztea mahaigaineratu da. Oraindik kasu gehiago ezagutu daitezkeela ohartarazi zuen Hernandezek.
