Itzal berdeak Donostian. Argoitz Ormazabal - Donostia.
Terrorea, berdez jantzita oraingoan. Igor, Maddi, Aitor atxilotuak, bortizki torturatuak eta kartzelatuak.
Eguneroko bizitza ikatza bezalako labezomorroak isurtzen hasi zenean itzal berdeak Donostian. Terrorea, berdez jantzita oraingoan. Igor, Maddi, Aitor atxilotuak, bortizki torturatuak eta kartzelatuak. Euskal gazteria beste behin ere kriminalizatua. Terrorearen mamua, gazte iraultzaileongan jauzi da oraingoan ere. Gazte belaunaldi borrokalariekin amaitu nahi dute. Gazteon borroka eta eraldaketarako grina bortxa ankerrenaz zapuztu nahi dute. Ez da hau lehen aldia izan, ez eta ziurrenik azkena izango ere. Otso beltzak ez du mugarik.
Baina alferrik da, berandu dabiltza, eta ez dute ezer lortuko honezkero Herri aske bateko herritar aske izateko hautua hartu genuenez gero, berandu dabiltza. Eta norabide horretan ekin genion eraldaketaren bidaiari, borrokaren motxila soinean hartuta, independentzia eta sozialismoa helmuga. Eta berandu dabiltza, gure bizi nahiari ez baitzaio beldurra nagusituko. Argia maite dugunoi, itzalak argi nahia baino ez digulako eragiten. Gazteak garelako, eta etorkizuna borrokaz eraikitzeko determinazio osoa dugulako. Eraldaketa eta borroka, bizitza ulertzeko dugun modu bakarra delako. Horrelakoak gara. Gure independentzia mugatu nahi duten hedabide, polizia, politikari profesional, enpresari, jauntxo, espekulatzaile eta enparauren aurrean, borrokaren bandera sendo altxatzeko prest gaudelako. Guztia irabazteko dugulako. Independentzia behar dugulako. Borrokak aske egiten gaituelako, berandu dabiltza.
Bien bitartean, nahi adina lore moztuko dute, baina udaberria gelditu, inoiz ez. Igor, Maddi, Aitor indar eta maitasunez beteriko besarkada tonak zuentzako. Independentzia eta sozialismoaren bidean, justizia eta bakearen bidean, borrokan tinko jarraituko dugu. Gora euskal gazteria iraultzailea! Jo eta ke, irabaziko dugu.
