Indar armatuek «alde egin» dezatela exijitu dute Leitzan.
Nafarroan egin dituzten maniobra militarrak salatu eta indar armatu «atzerritarrek» Euskal Herritik «alde egin» dezatela exijitzeko manifestazioa egin zuten atzo ehun lagunek Leitzan. «Eredu espainola inposatzera etorri dira baita Espainiaren alde aritzeko prest daudela esatera», ohartarazi zuten. Horregatik, «behar-beharrezko» jo zuten aldentzea.
Nafarroako hainbat herritan eginiko maniobra militarrak salatu zituzten atzo Leitzan ehun lagunek, eta Guardia Zibilaren lau patrol gertutik izan zituzten. Manifestazioaren amaieran eman zituzten datuen arabera, 600 bat militarrek esku hartu zuten «Guion 05» deitutako maniobra horietan. 89 ibilgailuren, 3 helikopteroren eta beste hainbeste hegazkinen laguntza izan zuten, eta Bortzirietan, Malerrekan, Erronkarin, Zaraitzun, Larraunen, Sakanan, Ultzaman, Basaburuan, Iruñean eta Goi Erriberan ibili ziren.
Maniobra horiek egiteko ez zutela «inolako» baimenik eskatu eta udalei ez zietela informaziorik eman gogorarazi zuten mobilizazioan. «Jakin badakite ez direla ongietorriak. Behin baino gehiagotan frogatu da hori, udalek ez baitiete beren lurretan ibiltzeko baimenik eman», nabarmendu zuten. Euskal Herrian maniobrak egiteak «argi erakusten du ez dutela herritarren borondatea errespetatzen eta ulertzen duten hizkuntza bakarra armen bidezko inposaketa dela».
Helarazi zutenez, «eredu espainola inposatzera» eta euskal herritarrei «abisu bat ematera» etorri ziren. «Espainiaren alde eta gure askatasun grinaren aurka aritzeko hemen daudela esatera etorri zaizkigu», adierazi zuten. «Armen erakustaldiaren bidez beldurra hedatu nahi» dutela ohartarazi zuten.
Horregatik guztiarengatik, estatu espainol eta frantseseko indar armatuak «prozesu demokratikoari begira oztopo izango» direla adierazi zuten. «Herriari hitza ematean oinarri- tutako prozesu batean faktore baldintzatzailea izango dira beti», esan zuten. Horregatik, behar-beharrezkotzat» jo zuten «gerra egitera etorri zirenak alde egitea». «ETAri behin eta berriz armak uzteko eskatzen dioten horiek noiz eskatuko diote Armadari euskal herritarrak bakean uzteko?», galdetu zuten irakurritako agirian.
ADN.es Medio Oficial Premios Bitacoras 2008: