Belen Gonzalez presoa bihar estradita dezaketela salatu dute ingurukoek.
Zazpi urteko espetxe zigorra bete berri du Estatu frantsesean, baina orain Madrilen zigortu nahi dute. Protesta manifestazioa deitu dute, 20.00etan, Lazkaoko plazan.
Belen Gonzalez euskal preso politikoa bihar estraditatu dezaketela-eta, Lazkaon astelehenenean agerraldia egin zuten bere senideek eta lagunek neurriarekiko gaitzespena agertzeko, eta bide batez, bere askatasuna aldarrikatzeko.
Bertan esan zutenez, zazpi urte pasa dira Polizia frantsesak Gonzalez atxilotu zuenetik, eta bertako zigorra beteta, «Frantziak Espainiaren esku utziko du».
«Belen Parisetik Madrileko aireportura iritsi bezain laster atxilotu eta ondoren Entzutegi Nazionalera bahiturik eramango digute berriro ere», salatu eta zera erantsi zuten: «Estatu espainolak bere aldetik presioa sartuz, beste zigor kartzela bat jazarriko dio».
Senide eta lagunen esanetan, lazkaotarrak orain 25 urte alde egin behar izan zuen sorterritik «Euskal Herriak pairatzen duen gatazka politikoaren ondorioz», eta urteotan egin ibilbidea ere luzea izan dela esan zuten. «Gaztea zela erbesteratu behar izan zen Polizia atzetik zuelako. Urteak ihesi ibili ostean, Euskal Herriko gatazka konpontzeko 1989an izan zen saiakeran parte hartu zuen Argelian, mintzakide modura» gogorarazi, eta gero Madrilgo «borondate ezagatik elkarrizketak zapuztean», Santo Domingora hainbat urtez deportatua izan zela ere azaldu zuten.
Protesta mobilizazioa Lazkaon
Urteak pasata, «egoera ilegal honekin hautsi eta alde egin zuen, Frantziar Estatuan atxilotu zuten arte». Bertako kartzelatan zazpi urtez izan da giltzapetuta, azken urteak Lazkaotik mila kilometrora dagoen espetxean, alegia.
Beren ustez, Estatu frantses zein espainolak «gorroto eta mendeku politika jarraituz» aspaldi zuten hartua estradizio erabakia. Hala, bihar Belen Gonzalez «Polizia espainiar torturatzailearen esku» utziko dutela-eta, protesta manifestazioa deitu dute, 20.00etan, Lazkaoko plazan.
