Kale eraso bat egotzita, 53na urteko zigorra eskatu dute 6 gazterentzat.
31na urteko espetxeratzea galdegina zuen fiskalak baina eskaria aldatu egin du epaiketan.
Egoitz Coto, Bittor Franco, Zigor Blanco, Jon Sebasten Gurtubai, Ander Arrillaga eta Aitor Urtasunentzat 53na urteko espetxe zigorra eskatu du Juan Del Moral fiskalak, kale eraso batean parte hartu izana egotzita.
Espainiako Auzitegi Nazionalean epaitzen ari dira sei gazte bizkaitarrak, epaiketa data lau aldiz atzeratu ondoren. Astelehenean hasi zen eta gaur amaituko da ahozko saioa. Epaituetatik lau preso daude. Arrillaga eta Urtasun bakarrik daude aske.31na urteko zigor eskaerarekin abiatu zen epaiketa. Atzo, baina, fiskalak gertaeren kontakizuna moldatu, eta eskaera aldatu zuen. 53na urteko espetxeratzea eskatu zuen epaitu bakoitzarentzat. Fiskalak, bi hilketa saio egitea eta kalteak eragitea egotzi dio gazte bakoitzari, eta delitu horiek «terrorismoaren» barnean kokatu ditu. Hilketa saio bakoitzagatik 18na urteko zigorra eskatu du; eragindako kalteengatik, 17 urtekoa.Defentsako abokatuek absoluzioa galdegin dute epaitu guztientzat. Izan ere, Arantza Zulueta abokatuaren esanetan, akusatuek egozten zaien ekintzan parte hartu zutela erakusten duen frogarik ez dago. Atxilotuek polizia etxean egindako deklarazioak dira fiskalak aurkeztutako froga nagusietako bat. Baina horiek ez dute sinesgarritasunik defentsaren ustez, «torturapean egindako deklarazioak direlako». Aurkeztutako ADN frogak egiaztatu gabe daudela dio defentsak, halaber.2001. urteko abuztuan Portugaleten kutxazain bat erretzea, Ertzaintzarekin istiluak izatea eta bi ertzain zauritzea egozten die fiskalak sei gazteei.
