Jon Lopez, Diego Ugarte eta Eneko Aizpuru kartzelan sartu dituzte.
Euroagindua eta estradizioa baliatuta, hirurak Espainiaratu eta Madrilen espetxeratu dituzte.
Jon Lopez eta Diego Ugarte euskal presoak eta Eneko Aizpuru Soto del Realeko espetxean sartu zituzten atzo, Madrilen. Euroagindua baliatu du Belgikak eta estradizioa Frantziak hirurak Espainiaratzeko.
Askatasunak jakinarazi zuenez, Eneko Aizpuru atzo goizean eraman zuten Espainiako Auzitegi Nazionalera deklaratzera. Haika-Segi auzian dago auzipetuta gaztea, eta auziari lotutako eginbideen harira eraman zuten deklaratzera. Aizpuru espetxeratzeko agindu zuen epaileak. Hamalau urteko espetxe zigorra arriskatzen du gazteak auzia dela eta.
Aipagarria da Frantziako Poliziak herenegun preso atxiki zuela gaztea, berri agentziek zabaldu zutenez. Hala ere, gaztearen ingurukoek ez zuten haren inguruko berririk izan. Ziburun bizi zen gaztea. Noiz Espainiaratu zuten ere ez dute oraindik argitu.
Belgikaren aginduz Jon Lopezi eta Diego Ugarteri, berriz, Belgikak aplikatu zien euroagindua. Herenegun Madrilera eraman zuten Ugarte, eta espetxeratu. Auzitegi Nazionalera, berriz, atzo goizean eraman zuten, hari Espainian egotzitako hainbat auzi direla-eta deklara zezan. Epaileak Soto del Realen espetxeratzeko agindu zuen deklaratu ostean. Hiru auzi dauzka zabalik euskal presoak Espainian. Askatasunak nabarmendu zuenez, «bi atxiloturi torturatuta ateratako deklarazioetan oinarritzen dira auziok».
Lopez ere herenegun Espainiaratu zutela zabaldu zuten berri agentziek, baina Askatasunak ezin izan zuen hori baieztatu. Jada epaitua zegoela eta, ez zuten auzitegira eraman, eta zuzenean espetxeratu zuten, zigorra betetzeko. Basaurin autobus bat erretzea egotzita, 17 urteko espetxe zigorra ezarri zion Auzitegi Nazionalak gazteari.Iazko martxotik, atxilotu zituztenetik, Belgikan zeuden preso Ugarte eta Lopez. Bi euskal presoen aurka han zabaldutako auzia, baina, itxi egin zuten, auzibidean eginiko entzuketak baliogabetu ostean. Euroagindua baliatzeko bidea ireki du horrek. Belgikako Gobernuak euroagindua betetzea gaitzetsi du Batasunak. «Torturatzen» duen estatu batekin elkarlanean aritzea dela iritzi dio horri, eta kezka agertu du Diego Ugartek eta Jon Lopezek izan ditzaketen eskubide murrizketengatik. Halaber, Eneko Aizpuru babesik gabe dagoela salatu du Batasunak, ohar baten bidez.Bestalde, estradizioak gaitzesteko, manifestazioa egin zuten atzo Donostiako Gros auzoan Eneko Aizpururen bizilagunek. Herenegun, berriz, dei baten bidez jakinarazi zutenez, Groseko Galtzara Nagusia pankarta batez itxi zuten 30 lagunek. Zazpi zabor ontzi ere erre zituzten, estradizioengatik protesta egiteko.
